काठमाडौं । प्रधानमन्त्री बालेन शाहले संवैधानिक परिषदको बैठक बोलाएका छन् । संवैधानिक निकायका रिक्त पदहरूमा नियुक्ति सिफारिस गर्न बैठक आह्वान गरिएको हो ।
स्रोतका अनुसार बैठक बिहीबार साँझ ५ बजेका लागि तय गरिएको छ ।
सरकारको दोस्रोपटकको सिफारिसमा राष्ट्रपति रामचन्द्र पौडेलले मंगलबार संवैधानिक परिषदसम्बन्धी अध्यादेश जारी गरेपछि रिक्त पदहरूमा नियुक्तिको प्रक्रिया अघि बढ्ने बाटो खुलेको हो ।
हाल प्रधानन्यायाधीश, प्रमुख निर्वाचन आयुक्तलगायत महत्वपूर्ण संवैधानिक पदहरू खाली छन् । राष्ट्रिय प्राकृतिक स्रोत तथा वित्त आयोगमा अध्यक्षको पद रिक्त रहेको छ भने एक सदस्यबाहेक अन्य पदहरू खाली छन् । अख्तियार दुरुपयोग अनुसन्धान आयोगमा एक सदस्यको पद खाली छ ।
त्यस्तै, समावेशी आयोगमा अध्यक्ष र एक सदस्य, महिला आयोगमा एक सदस्य, तथा मुस्लिम आयोग र थारू आयोगमा पनि विभिन्न पदाधिकारीका पदहरू रिक्त रहेका छन् ।
कानुनी व्यवस्थाअनुसार संवैधानिक पदहरूमा नियुक्तिका लागि सरकारले सिफारिस गर्ने र संसदीय सुनुवाइ प्रक्रिया पूरा भएपछि राष्ट्रपतिबाट नियुक्ति हुने व्यवस्था रहेको छ ।