प्रधानमन्त्री ओलीद्वारा तीज पर्वको शुभकामना व्यक्त -

काठमाडौँ । प्रधानमन्त्री केपी शर्मा ओलीले तीजलाई केवल नाचगानको पर्वका रूपमा मात्र बुझ्न नहुने बताएका छन् । उनका अनुसार तीज आत्मिक शुद्धता र दाम्पत्य जीवन सुदृढीकरणसँग सम्बन्धित उत्सव हो ।

तीज पर्वको अवसरमा शुभकामना सन्देश दिँदै प्रधानमन्त्री ओलीले भनेका छन्, ‘तीजलाई प्रायः गीत-नृत्यको पर्वका रूपमा मात्रै बुझिने गरिएको छ । तर यसको मूल सम्बन्ध व्रत, संयम र आत्म–अनुशासनसँग गहिरो रूपमा जोडिएको छ ।’

उनका अनुसार प्राचीन समयमा पतिपत्नी दुवैले सप्तऋषिको पूजा गर्दै व्रत बस्ने चलन थियो । समयक्रममा महिला मात्र व्रत बस्ने परम्परा विकसित भयो । अहिले समाजमा यसबारे विभिन्न मतहरू देखा परेका छन् । तर हाम्रो संस्कृतिले तीजलाई आत्मिक शुद्धता र दाम्पत्य जीवन सुदृढीकरणको व्रतोत्सवका रूपमा लिएको छ ।

दिदीबहिनीहरूलाई तीजको शुभकामना दिँदै प्रधानमन्त्री ओलीले आफ्नो फेसबुक पेजमा लेखेका छन्, ‘संयुक्त परिवार संस्कृतिको सुगन्ध बोकेको हरितालिका तीजले सबैको परिवारमा आत्मीयता, दाम्पत्यमा उल्लास र समाजमा सौहार्द फैलाओस् ।’