काठमाडौं । नेकपा (एमाले)का अध्यक्ष केपी शर्मा ओलीले सुन तस्करी काण्ड नेकपा माओवादी केन्द्रका नेताहरूको वरिपरि घुमेको बताउनुभएको छ ।
नेकपा (एमाले) केन्द्रीय प्रचार तथा प्रकाशन विभागको दशौं बैठकलाई सोमबार पार्टी केन्द्रीय कार्यालय, च्यासल, ललितपुरमा सम्बोधन गर्दै अध्यक्ष ओलीले सुन तस्करी काण्ड माओवादीभन्दा बाहिर जानैसक्दैन भन्नुभयो ।
घटनाक्रमहरूले सुनकाण्डमा माओवादीको संलग्नता देखिएको र उनीहरूले घटनाक्रमलाई अन्यत्र मोड्न खोजेको उहाँले वताउनुभयो ।
गोदाममा रहेको साढे नौ किलो सुन हरायो, यो भन्दा राज्यशक्तिको भद्दा दुरूपयोग के हुन्छ ? प्रश्न गर्दै अध्यक्ष ओलीले गृहमन्त्री मातहतको मेसिनरीले के हेरेको ? यसमा गृहमन्त्रीको संलग्नता छ, यसै कारण गृहमन्त्रीको राजीनामा मागिएको हो भन्नुभयो ।
गृहमन्त्रीको संलग्नता भएकै कारण घटनाक्रमलाई अन्यत्र मोड्न यता उता देखाउने र ‘टार’ र ‘कोट’ को कुरा गरेको वताउँदै सरकारको जिम्मेवार मन्त्रीले अरूमाथि आरोप लगाउँदा पुष्टी गर्नुपर्ने भनाइ उहाँले राख्नुभयो ।
अध्यक्ष ओलीले केन्द्रीय प्रचार तथा प्रकाशन विभागलाई पार्टीका बारेमा जनतालाई सकारात्मक प्रभाव पार्न जनचेतना अभिवृद्धि गर्ने काममा थप क्रियाशील बन्न निर्देशन दिनुभयो ।
विभागले एमालेको विचार, नीति र सिद्धान्तको पक्षमा अझ धेरै काम गर्न जरूरी रहेको उहाँको भनाइ छ ।
अध्यक्ष ओलीले पार्टीमाथि भइरहेको चौतर्फी हमलाको सामना गर्न पनि पार्टीको प्रचार विभागले महत्वपूर्ण भूमिका खेल्नुपर्ने वताउनुभयो । उहाँले विभाग सदस्यहरूलाई अभिव्यक्तिका मामिलामा नमूना बन्न आग्रह गर्नुभयो ।
