काठमाडौं । नेकपा (एमाले) का अध्यक्ष केपी शर्मा ओलीले नागरिकता विधेयकमा कमी कमजोरी बाँकी नरहुन् भनेर राष्ट्रपतिले छलफल र पुनर्विचारको मौकाका रूपमा संसदमा फिर्ता पठाए पनि गठबन्धनमा रहेकाहरूले छलफल नगराई पुनः राष्ट्रपतिकहाँ पठाउने निर्णय गरेर पाखुरे बल र मसलको भाषा बोलेको वताउनुभएको छ ।
अध्यक्ष ओलीले भन्नुभयो– ‘नागरिकता विधेयक संसदमा पुनः प्रवेश हुन पाएको छैन, छलफल नगराई पठउने भनेर निर्णय गरिसके, कस्तो संसदीय अभ्यास हो यो ? यस्ताले देश बनाउँछन् ? देशका लागि दुर्भाग्य हो ।’
‘यिनीहरूबाट देश बचाउनुपर्छ, नेपाली जनताले यस्तालाई सरकारमा राखिराख्नुहुँदैन, त्यसका लागि सबै एकताबद्ध भई आगामी निर्वाचनमा यिनीहरू सबैलाई पराजित गर्नुपर्छ,’ अध्यक्ष ओलीको भनाई थियो ।
नेकपा (एमाले) देश बनाउने अभियानमा रहेको र यसको सम्पूर्ण ध्येय ‘समृद्ध नेपाल, सुखी नेपाली’ को राष्ट्रिय आकाङ्क्षा पूरा गर्ने रहेको चर्चा गर्दै अध्यक्ष ओलीले देशभरका बामपन्थी, देशभक्त, परिवर्तन र रूपान्तरणको पक्षमा रहेका सबैलाई एमालेमा आउन पुनः आह्वान गर्नुभयो ।
जनता समाजवादी पार्टीका केन्द्रीय कार्यकारिणी परिषद्का सदस्य हेमराज राई, सोही पार्टीका केन्द्रीय सदस्यहरू लगायत विभिन्न कमिटीका कार्यकर्तालाई पार्टीमा प्रवेश र स्वागत गर्न बुधबार पार्टी कार्यालयमा आयोजित कार्यक्रममा अध्यक्ष ओलीले भन्नुभयो – ‘काँग्रेसको पुच्छर बनेर बामपन्थी भइन्छ ?
यतिबेला देशव्यापी रूपमा नेकपा (एमाले) मा प्रवेशको लहर चलिरहेको र यो क्रम आगामी मंसीर ४ गते विहानसम्म चल्ने वताउँदै अध्यक्ष ओलीले देशलाई बर्बादीबाट जोगाउन सबै मिलेर अगाडि बढौं, एकताबद्ध भएर देश बनाऔं भन्नुभयो ।
आगामी निर्वाचनमा लुटको राज मच्चाइरहेका गठबन्धनवालाहरूलाई पराजित गर्नुपर्ने वताउँदै अध्यक्ष ओलीले भन्नुभयो–‘नेकपा (एमाले) ले जित्दा देशले जित्ने छ, राष्ट्रियता, लोकतन्त्र, सुशासन, शान्ति सुरक्षा सबै क्षेत्रले जित्ने छ ।’
