काठमाण्डाै – नेकपा एमालेका अध्यक्ष केपी शर्मा ओलीले संविधान दिवसको अवसरमा सरकारले नेताका आफ्नो परिवार र नातागोताभित्रका मानिसहरूलाई पदक दिएकाे भन्दै तिखो आलोचना गर्नुभएकाे छ ।
आज आइतवार सातौँ संविधान दिवस तथा राष्ट्रिय दिवसको अवसरमा नेकपा एमालेले आयोजना गरेको कार्यक्रममा बोल्दै ओलीले संविधान दिवसको दिन शहीदका आमाबुबा, शहीदका सन्तान, घाइतेहरूले तक्मा पाउनुपर्नेमा नेताका श्रीमती र बुबाले तक्मा पाउनु विडम्बना भएको टिप्पणी गर्नुभयाे ।
सरकारले ७० दिनमा पनि पूर्णता पाउन नसकेकोप्रति एमाले अध्यक्ष ओलीले आलोचना गर्नुभयो । उहाँले भन्नुभयो, ‘७० दिनमा सरकारले पूर्णता पाउन सकेको छैन । कति हाइसञ्चो हेर्नुस् त । कति हाइसञ्चो । आज संविधान दिवस । यो संविधान दिवसलाई जनताले आफ्नो संविधान दिवस ठान्नुपर्ने, यति बेला जनताको पराक्रमी सन्तानले सम्मानित हुन पाउनुपर्ने । सम्मानित भएको अनुभूति गर्न पाउनुपर्ने । गर्व गर्नुपर्ने । बालाई सम्मान । श्रीमतीलाई सम्मान । कस्तो विडम्बना यस देशको ? कस्तो भोका जुकाहरू पुगेका छन् शासनमा ? लाज लाग्छ संविधान दिवसका दिन बोल्दा । संविधान दिवसका दिन त संविधान ल्याएकोमा, लोकतन्त्र पाएकोमा, यो सफलता पाएकोमा शहीदका सन्तानले गर्व गर्न पाउनुपर्ने । शहीदका आमाबाबुले गर्व गर्न पाउनुपर्ने । घाइतेहरूले सम्मानित हुन पाउनुपर्ने । आज त बाउको मुख हेर्ने दिन हो ? श्रीमतीको मुख हेर्ने दिन हो ? छोराछोरीको मुख हेर्ने दिन हो ? कस्तो लालसा ? कस्तो भोक ? कस्तो आकाङ्क्षा ?’
उहाँले नयाँ संविधान बनेपछि राजनीतिक परिवर्तनका लागि सङ्घर्ष गर्नुपर्ने दिनको अन्त्य भएको उल्लेख गर्नुभयो । नेपालको परिवर्तनका लागि अब हिंसा आवश्यक र स्वीकार्य छैन भन्ने स्पष्ट पारेको पनि उहाँको भनाइ छ ।