एजेन्सी । युभेन्ट्स कोपा इटालियाको फाइनलमा प्रवेश गरेको छ ।
गएराति भएको सेमिफाइनलको दोस्रो खेलमा फियोरेन्टिनालाई २-० समग्रमा ३-० गोल अन्तरले पराजित गर्दै युभेन्ट्स फाइनलमा पुगेको हो । पहिलो लेगमा युभेन्ट्सले १-०को जित निकालेको थियो ।
घरेलु मैदानमा युभेन्ट्सलाई जित दिलाउनको लागि फेडरिको बर्नरडेस्ची र डानिलोले समान एक-एक गोल गरे ।
खेलको ३२औं मिनेटमा फेडरिको बर्नरडेस्चीको गोलबाट युभेन्ट्सले सुरुवाती अग्रता लिएको थियो । त्यसपछि इन्ज्युरी समयको थप गरिएको चौथो मिनेटमा डानिलोले गोल गर्दै युभेन्ट्सलाई २-० को जित दिलाए ।
अब युभेन्ट्सले उपाधिको लागि इन्टर मिलानसँग प्रतिस्पर्धा गर्नेछ । इन्टर मिलानले एसी मिलानलाई ३-० ले पराजित गर्दै फाइनलमा स्थान पक्का गरिसकेको छ । फाइनल ११ मेमा रोममा हुनेछ ।