काठमाडौं । नेकपा (एमाले) का महासचिव शंकर पोखरेलले नेपालीलाई नक्कली शरणार्थी बनाएर विदेश पठाउनु राज्यविरुद्धको घात र गम्भीर अपराध भएको बताउनुभएको छ ।
अखिल नेपाल राष्ट्रिय स्वतन्त्र विद्यार्थी युनियनको केन्द्रीय कमिटीको दोस्रो बैठकको तुल्सीलाल स्मृति प्रतिष्ठान, च्यासल, ललितपुरमा विहीबार उद्घाटन गर्दै महासचिव पोखरेलले नक्कली भुटानी शरणार्थी प्रकरणको निर्दोष कोही नफसाउने र दोषी उम्किन नदिने गरी निष्पक्ष छानबिन हुनु जरूरी रहेको बताउनुभयो ।
उहाँले लडाकू शिविर घोटाला, बालुवाटार जग्गा प्रकरण, बजेट निर्माण गर्दा राजश्वका दरहरू हेरफेर गरी निश्चित व्यापारिक घरानालाई पोस्ने र राज्यलाई डुबाउने प्रकरण पनि छानबिन गरौँ भन्नुभयो ।
समाजमा पार्टी र नेताहरू खराब हुन् भन्ने भाष्य खडा नगर्न आग्रह गर्दै महासचिव पोखरेलले देशको आर्थिक अवस्था अहिलेको स्थितिमा पुग्नुमा प्रधानमन्त्री पुष्पकमल दाहाल ‘प्रचण्ड’ र नेपाली काँग्रेसका सभापति शेरबहादुर देउवा जिम्मेवार रहेको वताउनुभयो ।
उहाँले वैधानिक अर्थतन्त्र कमजोर पार्न अवैधानिक अर्थतन्त्रलाई प्रोत्साहित गर्ने नीति अवलम्वन गरेकै कारण आज नेपाल आर्थिक सङ्कटमा फसेको र यसको जिम्मेवारी सत्ता गठबन्धनले लिनुपर्ने वताउनुभयो । महासचिव पोखरेलले अनेरास्ववियुले देशको शिक्षा प्रणाली परिवर्तनको आन्दोलन थाल्नुपर्ने बताउनुभयो ।