धनगढी । नेकपा एमाले कैलालीका जिल्ला अध्यक्ष यज्ञराज ढुंगाना आगामी फागुन २१ गते हुने प्रतिनिधिसभा निर्वाचनमा कैलाली क्षेत्र नम्बर–५ बाट उम्मेदवार बनेका छन् । पाँच निर्वाचन क्षेत्र रहेको कैलालीमा पार्टी संगठनको नेतृत्व गर्दै आएका ढुंगानामाथि आफूसँगै अन्य चार क्षेत्रका पार्टीका उम्मेदवारलाई जिताउनुपर्ने जिम्मेवारी छ ।
उमेरले ४६ वर्षका ढुंगाना पहिलो पटक संसदीय निर्वाचनमा होमिएका छन् । उनले विद्यार्थी संगठनबाट आफ्नो राजनीतिक यात्रा सुरु थिए । २०५४ सालमा अनेरास्ववियुबाट राजनीतिक यात्रा सुरु गरेका उनले कैलाली बहुमुखि क्याम्पसको प्रारम्भिक कमिटी हुँदै जिल्ला अध्यक्ष र पछि केन्द्रीय सदस्यसम्मको जिम्मेवारी सम्हालेका थिए । उनले नेबिसँगको गढ मानिने कैलाली बहुुमुखि क्याम्पसमा २०६३ सालमा स्वतन्त्र विद्यार्थी युनियनको सभापति भएर नेतृत्व क्षमता देखाएका थिए ।
एमाले पार्टीको जिल्ला कमिटी सदस्यदेखि प्रदेश सचिवालय सदस्यसम्मको अनुभव बटुलेका ढुंगाना १२ फागुन २०८० मा सम्पन्न एमाले कैलाली जिल्ला अधिवेशनबाट जिल्ला अध्यक्षमा निर्वाचित भएका थिए ।
राजनीतिसँगै व्यवसायमा समेत सक्रिय ढुंगाना धनगढीमा नवजीवन अस्पताल सञ्चालन, इलेक्ट्रोनिक स्कुटर डिलर तथा स्वास्थ्य क्षेत्रसँग सम्बन्धित कलेजमा संलग्न छन् । संगठनात्मक पकड, सामाजिक पहुँच र व्यवसायिक पहिचानलाई उनले आफ्नो बलियो पक्षका रूपमा प्रस्तुत गरेका छन् ।
ढुंगानाले भने आफ्नो जित सुनिश्चित रहेको दाबी गर्दै शिक्षा, स्वास्थ्य र पूर्वाधार विकासलाई प्राथमिकतामा राखेर मत मागिरहेका छन् । आफू युवाको प्रतिनिधिका रूपमा चुनावी मैदानमा उत्रिएको उल्लेख गर्दै उनले पदमा नहुँदा पनि जनताको पक्षमा निरन्तर काम गरेको बताएका छन् ।
२०७९ को स्थानीय तह निर्वाचनअनुसार कैलाली–५ अन्तर्गत धनगढी उपमहानगरपालिकाका १९ र कैलारी गाउँपालिकाका २ वडा पर्छन् । धनगढीमा कांग्रेस बलियो मानिए पनि एमालेले पनि उल्लेख्य मत प्राप्त गर्दै आएको छ । यही राजनीतिक अंकगणित र आफ्नो संगठनात्मक प्रभावलाई आधार बनाउँदै ढुंगाना यसपटक जित निकाल्ने प्रयासमा छन् ।
कैलाली–५ एमालेका लागि प्रतिस्पर्धात्मक क्षेत्र मानिन्छ । २०७४ र २०७९ को निर्वाचनमा एमालेका नारदमुनी रानाले झिनो मतान्तरले पराजय बेहोरेका थिए । २०७९ मा कांग्रेसका उम्मेदवारले २१ हजार ३९२ मत ल्याउँदा एमालेका उम्मेदवारले २० हजार १३८ मत पाएका थिए । समानुपातिकतर्फ पनि कांग्रेसले १५ हजार ६१७ मत प्राप्त गर्दा एमालेले १४ हजार ३२१ मत ल्याएको थियो, जसले यहाँ एमाले र काँग्रेसबीच प्रतिस्पर्धा कडा रहेको देखाउँछ ।
